OROL FOJIASI VA INSON QISMATI: SHUKUR XOLMIRZAYEVNING “XORAZM, JONGINAM” HIKOYASIDA EKOLOGIK VA MA’NAVIY MUAMMOLAR

Abstract

Mazkur maqolada O‘zbekiston xalq yozuvchisi Shukur Xolmirzayevning “Xorazm, jonginam” hikoyasida ekologik fojia hamda inson qismati o‘rtasidagi badiiy-falsafiy munosabat tahlil qilinadi. Asarda Orol dengizining qurishi oqibatida Xorazm vohasida yuzaga kelgan ekologik inqiroz — havoning buzilishi, tuproqning sho‘rlanishi, tuz yog‘ini va qadimiy me’moriy obidalarning yemirilishi kabi oqibatlar insonning ruhiyati, kundalik hayoti hamda ijtimoiy qarashlariga ta’sir ko‘rsatuvchi omil sifatida yoritilgan. Yozuvchi ekologik inqirozni faqat tabiatga yetkazilgan zarar sifatida emas, balki insonning Vatan, tarixiy xotira hamda milliy qadriyatlarga munosabatini o‘zgartiruvchi murakkab ma’naviy-ijtimoiy hodisa sifatida talqin etadi. Maqolada ota va o‘g‘il obrazlari orqali ona zaminni anglashning ikki xil modeli, ekologik muhitning migratsion kayfiyatlarga ta’siri hamda tabiat va inson o‘rtasidagi uzviy bog‘liqlik ochib berilgan. Tadqiqot natijasida “Xorazm, jonginam” hikoyasining ekologik muammolarni badiiy idrok etish bilan bir qatorda, milliy o‘zlik va vatanparvarlik tuyg‘usini ifodalovchi muhim asar ekanligi asoslangan.