EKSPERIMENTAL 2-TIP QANDLI DIABET SHAROITIDA ROSUVASTATIN VA RM-1 POLIFENOLINING INSULIN REZISTENTLIGI VA BIOKIMYOVIY KO‘RSATKICHLARGA TA’SIRI

Abstract

Ushbu tadqiqotda streptozotosin (STZ) yordamida chaqirilgan eksperimental 2-tip qandli diabet modeli sharoitida rosuvastatin va RM-1 polifenolining insulin rezistentligi hamda asosiy biokimyoviy ko‘rsatkichlarga ta’siri o‘rganildi. Tajriba Wistar liniyasidagi 40 ta erkak kalamushlarda o‘tkazilib, ular to‘rt guruhga bo‘lindi: intakt guruh, diabet guruhi, rosuvastatin bilan davolangan diabet guruhi va rosuvastatin hamda RM- 1 polifenoli kombinatsiyasi qo‘llanilgan guruh. Natijalar shuni ko‘rsatdiki, eksperimental diabet sharoitida glyukoza darajasi, lipid spektri buzilishi, jigar fermentlari faolligi va HOMA-IR indeksi sezilarli darajada oshgan bo‘lib, bu og‘ir insulin rezistentligi rivojlanganini ko‘rsatdi. Shu bilan birga, gemostaz tizimida giperkoagulyatsion holat va trombotsitlar agregatsiyasining kuchayishi kuzatildi. Rosuvastatin monoterapiyasi glyukoza va lipid almashinuvini qisman yaxshilagan hamda insulin rezistentligini ma’lum darajada kamaytirgan. Biroq eng yuqori terapevtik samara rosuvastatin va RM-1 polifenoli kombinatsiyasida kuzatilib, unda insulin sezuvchanligi sezilarli darajada yaxshilangan, HOMA-IR indeksi pasaygan, lipid profil va gemostaz ko‘rsatkichlari esa sog‘lom guruhga yaqinlashgan. Olingan natijalar rosuvastatin va RM-1 polifenolining birgalikdagi qo‘llanilishi eksperimental diabet sharoitida metabolik va gemostatik buzilishlarni korreksiya qilishda istiqbolli yondashuv bo‘lishi mumkinligini ko‘rsatadi.