XITOY TILSHUNOSLIGIDA SO‘Z TURKUMLARI MASALASI VA 把 “BA” IYEROGLIFI

Abstract

Mazkur maqolada xitoy tilida so‘zlarning polifunksionalligi masalasi hamda uning til tizimida namoyon bo‘lish xususiyatlari tahlil qilinadi. Xitoy tili leksikasiga xos muhim jihatlardan biri — so‘zlarning turli grammatik va semantik vazifalarda qo‘llanish qobiliyati bo‘lib, bu holat tilning funksional moslashuvchanligini ta’minlaydi. Maqolada polifunksionallik nafaqat sintaktik tuzilmalarda, balki leksik birliklarning ma’nosi va qo‘llanishida ham aks etishi ta’kidlanadi. Shuningdek, zamonaviy axborot almashinuvi jarayonida insonlar fikrini ifodalashda turli til vositalaridan foydalanishi natijasida polifunksionallik holati yanada kengayib borayotgani ko‘rsatib beriladi. Tadqiqotda xitoy tilida keng qo‘llaniladigan 把 “ba” iyeroglifining leksik-grammatik xususiyatlari, uning polifunksional tabiati hamda turli nutqiy vaziyatlardagi qo‘llanish imkoniyatlari ko‘rib chiqiladi. Natijada, 把 “ba” birligi xitoy tilida semantik va sintaktik jihatdan moslashuvchan bo‘lib, tilning funksional imkoniyatlarini namoyon etuvchi muhim lingvistik birliklardan biri ekanligi asoslab beriladi.